Arsenal raportohet se ka intensifikuar interesimin për portierin Diant Ramaj, i cili aktualisht është i huazuar te FC Heidenheim nga Borussia Dortmund, në prag të hapjes së merkatos së janarit.

Sipas informacioneve, klubi londinez ka dërguar disa herë vëzhgues për të ndjekur nga afër paraqitjet e portierit 24-vjeçar gjatë këtij sezoni, duke treguar një interes serioz dhe të vazhdueshëm për situatën e tij.

Gazetari i Sport Bild, Christian Falk, raporton se Arsenali tani ka vendosur të rrisë konkretisht interesin për Ramaj, teksa synon të krijojë konkurrencë shtesë për portierin aktual titullar, David Raya.

Duke folur në rubrikën “True or Not True” të podcast-it të Sport Bild, Falk konfirmoi lajmin.

“Po, është e vërtetë. Ramaj është në listën e Arsenalit. Portieri i Heidenheim është në fakt vetëm i huazuar nga Dortmundi, ndaj Arsenali do të duhet të ulet në bisedime me ta.”

Ai shtoi gjithashtu se Ramaj u transferua te Borussia Dortmund në shkurt të vitit 2025 nga Ajax për një shumë mbi 5 milionë euro, ka kontratë deri në vitin 2029, dhe në moshën 24-vjeçare konsiderohet në një etapë shumë të mirë të karrierës.

“Do të ishte më tepër një investim për të ardhmen, por pa dyshim bëhet fjalë për një lojtar interesant dhe një klub shumë tërheqës për Ramaj,” përfundoi Falk.